افتهم لك مو الخبر يالول؟
- قتلوا الزعيم وخرجوا ينشروا للناس صور من داخل بيته لقوارير خمر يا زعم كان طارح لهن جنب راسه وجالس يسكر وهم صاحيين للعطوان.
وقالوا يومها انهم لقيوا جنب الخمر ملايين من اموال الشعب مكدسة في بيته والشعب ميت جوع.
- ناهي وين عد سارت هاذيك الاموال واين عد سارين قوارير الخمر؟
- اصبري مله.
وبعدا اقتحموا بيت عبدالوهاب قطران بديل
واختطفوه من بين جهاله وقالوا ان معه معصرة خمر في بيته وجالس يسكر والشعب ميت عطش وهو ما ادى لهم حتى من بجم بجم يستضوا العطوان.
- مله واين عد سارت المعصرة؟
- قالوا مسكوها قبل امس الظهر..
- مسكوا من؟
- مسكوا المعصرة يالول
- الله! اين مسكوها؟
- عند وزارة الإعلام..
كانت ماشيه في الشارع مع مهرب خمور خطير قد لهم فترة يترصدوه يوروه ويدوروا المعصرة؛ وحصلوهم الاثنين راكبين فوق سيارة الزميل محمد شبيطة امين عام نقابة الصحفيين.
وقالوا ان المهرب لما شاف رجال الامن رجم عليهم قنبلة وهرب وتسبب في مقتل اربعة منهم.
- ناهي واين عد سار مهرب الخمور بعدما هرب؟
- لحقوه رجال الامن وقتلوه.
- ايواااه..
طيب وما دخل أمين عام نقابة الصحفيين لوما يضربوا عليه رصاص؟
- كيف ما دخله؟
من قال له يركب معه مهرب خمور فوق سيارته يالول؟
وما كانوا يعملوا هم والمعصرة هاذيك الساع في الظهر؟
- هاااا
يعني يشتوا يقولوا انهم مابللا كانوا يعصروا ويسكروا جنب الوزارة حق السكارى.
- ايواااه افتهم لك مو الخبر ذلحين.
-تمام خيرة الله.
مهرب الخمور مات؛ وامين عام النقابة مصاب.
لكن اين عد جت المعصرة؟
- اهييييهاه..
عاد المعصرة هذي شتلف على كل بيت وعلى كل وزارة فيها ناس مع المرتزقة والعطوان.
- ابوها المعصرة ياضاك.
قولي ذلحين اين عد جين ذولياك القوارير القوارير الخمر الذي لقيوهن في بيت الزعيم؟
- لااااااا ماهولاك الا حاليات ومن الاصلي
وشربوهن في يومها واستفخوا وقالوا لنا انهم لقيوا ملايين من اموال الشعب مكدسة في بيت الزعيم وانهم شيرجعوها الصبح لخزينة الدولة..
- مله وين هي هذي الأموال ماعد دخلت خزينة الدولة؟
- اقولك بكروا سكارى
وضيعوا الطريق
وشلوها دورة ثقافية في صعدة
ورجعوا صنعاء يدوروا المعصرة يالول
من صفحة الكاتب على الفيسبوك
