فكري قاسم
شرعية الفنادق وكهنوت الانقلاب والمفارقة العجيبة
- تقولي شيرجعوا يمارسوا عملهم من داخل البلاد يا "لول"؟
- منهم؟
- المسؤولون حق شرعية الفنادق.. كم لهم عايشين خارج وكيف شيعملوا ذلحين مع قرار عودتهم؟ ومدري شيقدروا يتحملوا العيشة معانا داخل البلاد أو ماشي؟
- مساكين والله.. ماشيقدروش..
ومو شيرجعهم أصلا ياموسمك وقد إلفوا العيشة الرغيدة بالسعودي والدولار..
وقد ثلثهم قدموا لجوء لبلدان الله
وثلثهم قدهم مسجلين دراسات عليا.
والثلث الأخير منهم يا رحمتاه قد اختلف عليهم المرقد وكسر رؤوسهم لو قلت لواحد منهم ارجع البلاد.
- مله والحل كيف؟
- الحل انو مجلس القيادة يشتحط ويحرر البلاد فيسع ويعمل لهم حدائق ومتنزهات وفنادق حالية يغريهم بها منسب يرجعوا لنا بعد هذي الغيبة الطويلة سالمين غانمين وإلا حرام لايجننوا جنبنا في أسبوع.
* * *
- شوفي المفارقة العجيبة يا "لول"
- إيش هي؟
- المعلمون في صنعاء محتجين يطالبوا سلطة الأمر الواقع في مناطق سيطرة الحوثيين بتسليم رواتبهم..
وفي تعز الناس خرجوا إلى الشوارع اليوم في وقفه احتجاجية يطالبوا سلطة الأمر الواقع في المحافظة المحررة بتسليم قاتل هارب من وجه العدالة..!
- مساكين المدرسين في صنعاء ياموسمك..
لو كانوا عايشين في تعز الفات أنهم ذلحين قيادات كبيرة في الأمن والجيش.
- يعني ماهوه؟
- يعني أن سلطة المدرسين العسكرية في تعز ما يقدروا يمسكوا القاتل ولا يقدروا يسلموه للعدالة؛ ولا بينهم طافة لهذا الهدار الذي يمغص البطن.
زيهم زي الانقلابيين الحوثيين في سلطة صنعاء.. ما يقدروا يمسكوا البلاد سوا ولا يقدروا يسلموا الرواتب للمدرسين ولا بينهم طافة لهذا الهدار الأهبل.
- ناهي وما هو الحل يالول؟
- الحل يقع تخادم بين سلطتي الأمر الواقع في البلدين الشقيقين تعز وصنعاء ويسكهونا من هذي الشغلة.
- يعني كيف؟!
- يعني انو الحوثيين يمسكوا القاتل الهارب ويسلموه للعدالة والمدرسين في سلطة الأمر الواقع بتعز يسلموا لهم رواتب المعلمين في صنعاء مقابل هذه الخدمة وكفى الله المؤمنين شر القتال.
* * *
- ما لهم عيال القصبة ما يفتحوا الطرقات للناس يالول؟
- أنت مجنون وإلا بعقلك ياموسمك؟
- أنا بعقلي
- لا؛ والله إنك إلا مجنون.. كيف تطلب من قاطع الطريق أن يفتح الطريق؟!
- مله بس يكفي الناس عذاب.. اليوم ثمان سنين والمسافة التي يفترض أن الواحد يقطعها في عشر دقائق من داخل مدينة تعز إلى الحوبان؛ أو من الجراحي لحيس؛ تشل لها ثمان إلى عشر ساعات هذا حرام وظلم وجور على الناس.
- لمو وعيال القصبة بحسهم الناس؟ وإلا يهموا الناس؟
بن قولك هولا قطاع طريييق ياموسمك.. هولا عصابة سلالية ومايشتوا يخارجوا الناس لاطريق.
- كان مايشتوا؟
- يشتوا الناس كلهم يمشوا من طريق القصبة السلالية.
- طيب وهذي القصبة السلالية حقهم لاين شتوصلنا؟
- شتوصلنا إلى طريق إجباري لازم نمشيه لوما نوصل إلى حدف "الولاية".
- وما هي هذي الولاية؟
- ولاية القصبة ياموسمك!!
*جمعه "نيوزيمن" من منشورات للكاتب على صفحته في الفيسبوك
